Upptökumaður

Þær gleðifréttir voru að berast að náðst hafa samningar við myndatökumann og er hann í þessum blogguðum orðum að keyra vestur úr borg óttans. Staðið hefur verið í miklum og erfiðum samningaviðræðum við manninn, en hann hefur þótt einkar erfiður við að eiga og fór fram á frítt húsnæði og fæði fyrir sig og alla fjölskylduna á meðan á keppni stendur. Einnig gerði hann það að skilyrði að útveguð yrði barnfóstra fyrir son hans svo hann og hans kona gætu komið með á lokahóf Mýrarboltans 2007. Eftir miklar þrætur var þó látið undan þessum þörfum mannsins, sem og nokkrum öðrum sem viðsemjanda þóttu æði undarlegar. Hann vill t.d. bara gista í Fjarðarstræti Inn og fer hann fram á að keyptar verði tvær magnpakkningar af salernispappír á heimilið fyrir komu hans.

Þetta eru mikil og góð tíðindi þar sem myndatökumaður Mýrarboltans 2006 ætlar að vera með í að veltast í drullunni í ár.

Einnig hefur verið útvegaður svokallaður "upptökumaður", en hann mun sjá um að taka fólk upp úr drullunni skyldi það festast.

Glommarakveðjur,

The Man

Ein ég sit að sauma....... not.....

Það sat sko enginn einn að sauma í gær. Þrusumæting og heldur betur spýtt í lófana og stigið á bensínfótinn. Kolólöglegur hraði allt kvöldið.

Það er samt hittingur kl. 17:00 í dag í Öldunni. Frágangur og fínisering.

Þeir sem létu sjá sig í gær:

Matta H.

Eygló

Hjördís

Guðrún

Gunna

Harpa

Gyða

Svandís

Rósa

Auður

Magga

Natalý

Lísa

Linda

Snorri

Necchi Lydia

Pfaff

Singer

Þakkir til Thelmu frænku sem reddaði meira efni úr borg óttans.

Gló Magnaða.

 

Vel heppnaður saumaklúbbur!

Vel var mætt í Glyðrusaumaklúbbinn sem stóð frá þriðjudagssíðdegi og fram á þriðjudagskvöld, o oho fram á þriðjudagskvöld. Þau sem létu sjá sig voru:

Matta H.

Eygló

Guðrún

Hjördís

Linda

Harpa

Gunna

Gyða

Svandís

Rósa 

Arnaldur

Pfaff

Singer

Það var mikið afrekað og þrátt fyrir blóð, tár og svita (aðallega svita) voru allir glaðir og kátir! Tja, nema Gunna þegar verið var að rífa efnin.

Þó þetta séu eintómir snillingar sem mættu þá viljum við biðja þá sem eru á svæðinu að mæta í næsta saumaklúbb, þó ekki væri nema til að heilsa upp á okkur, þvælast fyrir og þykjast gera gagn - en næsti klúbbur verður miðvikudagskvöldið 1. ágúst og mun standa frá kl. 17:00 og fram eftir kvöldi.

Kv. RockSock

Allir sem mæta fá ókeypis kakóbolla á Langa Manga gegn 350 kr. gjaldi!!! Jibbí jeij!!!

Glyðrusaumaklúbbur

Glyðrurnar koma saman í dag heima hjá eiganda liðsins kl. 17:00 og hefja saumaskap.

Glyðrur allra landa sameinist því margar hendur vinna létt verk.

Allir Glommarar eru að sjálfsögðu velkomnir líka.

Nefndin

 

Nýr leikmaður

Umboðsmaður okkar er í samningaviðræðum við erlendan leikmann sem mun leika með GLYÐRUNUM ef hún fær sig lausa frá Real Madrid. Hún lék víst á árum áður með Boca Juniors í Argentínu og gekk í knattspyrnuskóla Maradonna þegar hún var yngri. Starfar einnig sem supermódel á Spáni.
Nánar síðar.

Nýjustu fréttir

Komið hefur í ljós að það er ekkert takmark á fjölda keppenda í hverju liði þannig að allir geta sótt um að vera í liðum Glyðru og Glommara á skraning.is svo kemur í ljós hvort fólki verður hafnað eða ekki. múahahahah.......

Minnum á gleðigjald liðanna sem er 2500 endilega að greiða það, helst í gær. Það á að dekka búninga og eitthvað af drykk og æti í okkar búðum (Camp-Langa).

Saumaskapur mun hefjast um leið og efnin berast okkur en þau eru föst í borg óttans. Ef einhver veit um ferð vestur með örlitlu aukaplássi fyrir smá teygjur og tvinna, þá er sá hinn sami beðinn um að láta glyðrurnar Hjördísi eða Eygló vita hið snarasta.

Kv. Gló Magnaða

2. fundur

Í gærkvöld var haldinn annar fundur vegna mýrarboltaundirbúnings. Það voru ekki mjög margir sem mættu, og þykir okkur það leitt, en þeir sem mættu unnu vel.

Mættir voru:

1. Eygló

2. Hjördís

3. Guðrún

4. Margrét Lára

5. Öddi

6. Íris

 

Unnið var að uppsetningu liðanna og má segja að kvennaliðið sé orðið fullskipað. Einhver pláss gætu verið laus í karlaliðinu og mun það koma í ljós á næstu dögum hvernig þau verða fyllt. Einhverjar mannabreytingar hafa orðið og verða þær kynntar síðar. Við viljum benda á að enn eru lausar stöður innan búðanna, s.s. staða þvottakonu, klappstýra o.fl.

Ákveðið var að liðsgjaldið verði 2500 kr. á hvern þátttakanda (hvort sem hann er spilandi leikmaður eða hefur aðra stöðu innan búðanna) og er æskilegt að fólk greiði sem fyrst þar sem líður að stórvægilegum útgjöldum. Eygló er gjaldkeri og er hægt að koma greiðslum til hennar. Íris getur einnig tekið við greiðslum á Langa Manga þegar hún er á vakt. Tekið skal fram að 2500 kr. liðsgjaldið er algjörlega óviðkomandi gjaldinu inn á Mýrarboltann sjálfan. Verði afgangur af liðsgjaldinu þá verður að sjálfsögðu haldin uppskeruhátíð eins og í fyrra.

Hver og einn leikmaður fær aðgangsorð að þessari heimasíðu þegar liðsgjaldið hefur verið greitt og getur þá bloggað sjálfur um undirbúninginn fyrir mótið og eigin tilhlökkun, eða komið nytsamlegum ábendingum til liðsfélaga sinna og annarra.

Stranglega bannað verður þó að uppljóstra liðsleyndarmálum! Gerist slíkt og þvílíkt verður það fjarlægt af síðunni og viðkomandi flengdur með blautu handklæði og látinn borða 7 keppi af blóðmör.

Leiter teiter!

RockSock

 

Tip dagsins: Áttu enga gamla og ljóta skó til að eyðileggja í mýrarboltanum? Hvernig væri að útvega eina slíka?

Toppmynd og nýjar myndir

Var að setja inn nýjar myndir og líka toppmynd.

Kv. The Man

Áfram nú!

Jæja gott fólk, nú skal hefjast undirbúningur Glyðra og Glommara fyrir Evrópumeistaramótið í Mýrarbolta 2007, sem haldið verður á Ísafirði um verslunarmannahelgina. Undirbúningur hefur reyndar þegar hafist og hefur hingað til verið í höndum nokkurra frábærra Glyðra (þ.e. þeirra sem mættu á fyrsta auglýsta fundinn) en vonandi geta fleiri bæst í hópinn því margar hendur vinna létt verk. Annar fundur verður haldinn á Langa Manga í kvöld kl. 21:00 og vonandi sjá fleiri sér fært að mæta þá.

Fundarboð eru send út í sms skeytum til skráðra félaga. Sé einhver að gleymast eða einhver nýr bæst í hópinn er hægt að senda tölvupóst á netfangið [e-mail] þar sem tilgreint er nafn og símanúmer félaga og verður viðkomandi þá bætt á sms listann.

Á næstu dögum mun verða sett inn talsvert af efni á heimasíðuna, m.a. myndir frá mótinu í fyrra og myndir af undirbúningi Glyðra og Glommara fyrir mótið í ár. Auðvitað verður svo bloggað um allar þær helstu fréttir sem hægt er að upplýsa, en auðvitað verður að vera eitthvað leyndó!

Glyðrur og Glommarar - lið fastakúnna, starfsmanna og annarra velunnara Langa Manga ehf.